Кездесуде айына 30 АЕК мөлшеріндегі, бірақ жылына 360 АЕК-тен аспайтын базалық салық шегерімінің қалай жұмыс істейтіні қаралды. Бұл шегерім салық салынатын табысты және жеке табыс салығының сомасын азайтады. Сондай-ақ міндетті зейнетақы жарналары, әлеуметтік аударымдар және ММС жарналары бойынша шегерімдер сақталады.
Жұмысшының табысы шегерім сомасынан аз болатын жағдайға ерекше назар аударылды. Бұрынғы кодексте пайдаланылмаған бөлігін жыл ішінде келесі айларға ауыстыруға болатын. Жаңа редакцияда мұндай мүмкіндік жоқ.
«Атамекен» ұлттық кәсіпкерлер палатасы бұрынғы ауыстыру тетігін қалдыруды ұсынды. Мемлекеттік кірістер комитетінің өкілдері шегерім ай сайынғы қолдау ретінде ойластырылғанын, ең алдымен табысы төмен жұмысшыларға арналғанын түсіндірді, сондықтан қалдықты ауыстырмай, әр ай үшін бөлек қолданылады.
Отырыс қорытындысы бойынша Мемлекеттік кірістер комитеті базалық шегерімнің келесі кезеңдерге ауыстырылмайтынын растайтын ресми түсіндірмелер дайындайды.
Әлеуметтік шегерімдер
Әлеуметтік салық шегерімі I және II топтағы мүгедектігі бар адамдар үшін 5 мың АЕК, III топтағы мүгедектігі бар адамдар үшін 882 АЕК, сондай-ақ мүгедектігі бар балалардың ата-аналары, асырап алушылар, қабылдаушы ата-аналар және қамқоршылар үшін құрайды.
Қолданыстағы кодекс жұмыс берушіні ауыстырған кезде пайдаланылмаған әлеуметтік шегерім сомасын есепке алуға мүмкіндік береді. Алайда кодексте бірнеше жұмыс берушіде бір мезгілде жұмыс істеген кезде шегерімді қолданудың тікелей тәртібі жоқ. Қаржы министрлігіне және Мемлекеттік кірістер комитетіне жеңілдіктің әлеуметтік бағытын сақтайтын және теріс пайдалану қаупін жоятын бірыңғай тәсіл әзірлеу тапсырылды.