Отырыс үкімет басшысының төрағалығымен өтті. Негізгі назар 1 шілдеде күшіне енген «Алатау қаласының арнайы құқықтық режимі туралы» Конституциялық заңға аударылды.
Даму жоспарлары және инфрақұрылым
Alatau City Authority бас атқарушы директоры Әлішер Әбдіқадыров ағымдағы жұмыс туралы айтты. Ұйым нормативтік базаны қалыптастыруда, стратегиялық құжаттарды әзірлеуде және инвестициялар тартуда. Инженерлік және көлік инфрақұрылымы Ынтымақ, Қоянқұс, Жетіген, Жаңадәуір және Жаңаталап шағын аудандарында дамытылуда.
Жыл соңына дейін ARUP және BCG компанияларының қатысуымен 2055 жылға дейінгі қаланың Ұзақ мерзімді даму жоспарын, сондай-ақ 2040 жылға дейінгі Стратегия мен Мастер-жоспарды аяқтау жоспарлануда.
Негізгі жобалар
Назарда K-Smart City, Alatau AI-Driven City және Alatau Crypto City жобалары. Alatau City Authority деректері бойынша, 51 мың жұмыс орнын құрумен 2 трлн теңгеге 53 инвестициялық жобадан тұратын пул қалыптастырылған. Олардың қатарында Iconic Complex, PepsiCo, Mars, Hyundai Green Food зауыттары, Khan Tengri Biopharma биофармацевтикалық зауыты, AutoFlight және Joby компанияларымен жобалар, сондай-ақ KAIST университеті кампусы бар.
Басқарудың жаңа органдары
Кеңес Alatau City Authority туралы Ережені бекітті. Мемлекеттік қор арнайы басқару ұйымына — мемлекеттік органға айналдырылды. Жедел басқару үшін Оперативтік комитет пен Реттеуші комиссия құрылды. Сондай-ақ Алатау қаласы әкімдігі жанынан Жер қатынастары жөніндегі уақытша комиссия құрылды.
Олжас Бектенов мемлекеттік органдар мен Alatau City Authority-ға негізгі бағыттар бойынша жұмысты жеделдетуді тапсырды.